EH Bildu: 'Estatuak arau europarra urratu du, eskubideak urratzeko'

Julen Arzuaga EH Bilduko legebiltzarkidearen esanetan, "Espainiako Gobernuak agindutakoa onartzeko denbora gehiago behar duelako" erabaki zuen atzo Auzitegi Gorenak presoen zigor pilaketari buruzko erabakia urtarrilera atzeratzea.

Prentsaurrekoan, Arzuagak salatu egin du Espainiako Gobernuaren espetxe politika "kriminala" dela, eta Estatuak "arau europarra urratzea erabaki izana, presoen eskubideak urratzen jarraitu ahal izateko".

"Arau europarraren letra eta izpiritua aldatzea erabaki du, interpretazio maltzurra eginez, [presoei] biziarteko espetxe zigorra ezartzeko", adierazi du parlamentari abertzaleak.

Arzuagak "kolektibo zehatz" batentzat "salbuespeneko ingeniaritza juridikoa" diseinatu izana egotzi dio Espainiako Gobernuari, "legaltasuna urratuta ere", "mendeku eta gerra estrategia baten baitan”.

Horren ildotik, presoen eskubideen urraketen salaketan "inplikatzea" eskatu dio EAJri.