Politika -
Presoaren heriotza
Gaixorik dauden presoak askatzearen alde, manifestazioa Arrasaten
Uribetxebarriaren senideek jakitera eman dutenez, bihar eguerdian hileta zibila egingo dute Aldai parkean, eta ekitaldian familiaren intimitatea errespetatzeko deia egin dute.
Erredakzioa
Iosu Uribetxebarria hildako presoaren lagun eta senideek Espainiako Gobernuaren kartzela politika salatu dute, eta manifestazioa deitu dute iganderako Arrasaten (Gipuzkoa), gaixorik dauden presoen askatasuna eta sakabanaketa amai dadin exijitzeko.
Uribetxebarriaren gertukoek prentsaurrekoa eman dute gaur Arrasaten. Bertan, Mari Asun Pagoagak esan du presoa "kartzela politika ankerraren" biktima izan dela.
Preso arrasatearrak kartzelan atzeman zioten gaixotasun larri bat zuen arren "etxean eta ospitalean" giltzapetuta izan dutela kritikatu du, eta "sakabanaketaren amaiera" eta gaixorik dauden presoen askatasuna aldarrikatu du.
Gaur arratsaldean ere protesta egin dute, eta iganderako manifestazioa deitu dute Arrasaten bertan, 'Giza eskubideak, irtenbidea, bakea, preso gaixoak etxera, sakabanaketaren amaiera' lelopean.
Bestalde, bihar eguerdian hileta zibila egingo dute Arrasateko Aldai parkean, eta ekitaldian familiaren intimitatea errespetatzeko eskatu dute.
