Jaurlaritzak ez du Kanpo Ekintza Legearen aurkako helegitea aurkeztuko

Josu Erkoreka Eusko Jaurlaritzako Herri Administrazio eta Justizia sailburuak eta Cristobal Montoro Espainiako Ogasun eta Herri Administrazioetako ministroak akordioa lortu dute Kanpo Ekintza Legearen hainbat artikuluren gainean, eta, ondorioz, ez dute helegiterik aurkeztuko Auzitegi Konstituzionalean.

Cristobal Montorok eta Josu Erkorekak sinatutako dokumentuak 11 manuren interpretazioa argitzen du, "Euskadik, bere eskumenen esparruan, gauzatutako atzerri-proiekzioko ekintzak babestu eta indartuz".

Eusko Jaurlaritzak ohar bidez jakinarazi duenez, akordioa Estatuaren eta Eusko Jaurlaritzaren arteko Aldebiko Batzordean 6 hilabetez negoziatu eta gero lortu da, eta Espainiako eta Euskadiko aldizkari ofizialetan argitaratuko da astelehen honetan.

Akordioaren arabera, Euskadik bere jarduera esparrua diseinatu eta babestu ahalko du kanpo-gaietan. "Aldebiko informazio eta kolaborazio-sistema ezarriko da, eta ez dio eragingo Euskadiri bere interesak kudeatzeko espresuki aitortutako autonomia politikoari. Hala, Eusko Jaurlaritzak arlo horretan gauzatutako ekintzek ez dute nahitaez Estatuaren baimenik jaso beharko.

Eusko Jaurlaritzak Estatuko Kanpo Ekintza Legearen aurrean jarrera oso kritikoa izaten jarraitzen du, lege horrek autonomia erkidegoen atzerriko ekintzak kontrolatu eta mugatu nahi dituela argudiatuta. Edozein kasutan, nabarmendu du Jaurlaritzaren helburua lege horrek Euskadiko kanpo ekintzan izan dezakeen eragina ahalik eta gehien murriztea eta Euskadiren kanpo ekintza propioa babestea zela.

Hala eta guztiz ere, Urkulluren Gobernuak lorturiko akordioari buruzko balorazio positiboa egin du. Horren iritziz, Eusko Jaurlaritzak kanpo gaietan duen eskumena indartzen du.