Lopez de Eguilazek fiskalaren aurrean deklaratu du

Fernando Lopez de Eguilaz Kutxabankeko Giza Baliabideen zuzendariak Bizkaiko Fiskaltzaren aurrean deklaratu du goizean, bankuko iturriek jakitera eman dutenez. Mario Fernandez erakundeko presidentea zen garaian izandako ustezko irregulartasunen inguruan azalpenak eman ditu Lopez de Eguilazek.

Mario Fernandez Kutxabankeko presidente ohiak Mikel Cabieces sozialistarekin harremana zuen abokatu-bulegoarekin sinatutako kontratuaren inguruko informazioa eskatu dio fiskalak Lopez de Eguilazi. Barne kontu-ikuskapen batean ustezko irregulartasunak atzeman zituen Kutxabankek, eta Espainiako Bankuari jakinarazi zizkion.

Gregorio Villabeitia Kutxabankeko presidenteak Frankfurtera (Alemania) joateko erabakia hartu zuen, Europako Banku Zentrala jakinaren gainean jartzeko, eta horren berri Fiskaltzari emateko gomendatu zion EBZk Kutxabanki.

Salaketaren berri izan eta gero, Bizkaiko Fiskaltzak deklaratzera deitu zuen Lopez de Eguilaz, eta baita Mario Fernandez eta Mikel Cabieces ere. Azken biek ostiralean deklaratuko dute.