Politika -
Atzerapena
Fernandezek, Cabiecesek eta Alcortak apirilaren 9an deklaratuko dute
Martxoaren 12an eta 13an inputatu gisa deklaratu behar zuten hirurek, baina epaileak hitzordua atzeratu behar izan du, abokatu batek joaterik ez zuelako.
Erredakzioa
Mario Fernandez Kutxabankeko presidente ohiak, Mikel Cabieces Espainiako Gobernuaren ordezkari ohiak eta Rafael Alcorta abokatuak apirilaren 9an deklaratuko dute inputatu gisa, EAEko Auzitegi Nagusiak jakitera eman duenez.
Kutxabank auzian diligentziak hasi zituen Ana Isabel Alvarez Fernandez epaileak, eta Mario Fernandez, Mikel Cabieces eta Rafael Alcorta martxoaren 12an eta 13an deitu zituen deklaratzera, inputatu gisa.
Hala ere, abokatu batek egun horietan bertaratzerik izango ez zuela eta, deklarazioak apirilaren 9ra eta 10era atzeratzea erabaki du epaileak.
Fernando Lopez de Eguilaz Kutxabankeko Giza Baliabideen zuzendariak eta Roberto Moll Kutxabankeko Kudeaketaren Kontrol Arloko zuzendariak apirilaren 10ean deklaratuko dute lekuko gisa, Kutxabankek salaketa aurkezteko erabili zuen txostena horien ardurapean egin baitzuten.
Autoa
Epaileak autoan jaso duenez, inputatuek Carmen Adan del Rio Bizkaiko fiskalaren aurrean esandakoetatik eta aurkeztutako dokumentaziotik bidegabe jabetzea edo administrazio desleiala egin ahal izan dutela ondoriozta daiteke.
Era berean, merkataritza-agiriak faltsutzea egotzi diete, ?entitatetik dirua ateratzeko erabili zituzten agiriak? direla eta.
