Aguirre: 'Batzorde kudeatzailea jarriz gero, ez naiz hautagai izango'

Madrilgo PPren presidente Esperanza Aguirrek ohartarazi duenez, Madrilgo Alkatetzarako hautagai izateari uko egingo dio Alderdi Popularrak batzorde kudeatzailea sortzea erabakitzen badu.

Cadena Cope irrati-kateari egindako adierazpenetan Aguirrek onartu duenez, Maria Dolores de Cospedal PPko idazkari nagusiak hautagai izango zela esan zion ostiralean, baina Madrilgo Presidentetza uzteko eskatu zion.

Eskaera hau ukatu egin zuela azpimarratu du Aguirrek, PPren estatutuen arabera, zuzendaritzak kongresuetan erabakitzen direlako.

Gainera, antzeko adierazpenak ere egin ditu Twiterren:

"Nahi badute, batzorde kudeatzailea jar dezatela bihar, eta orduan beste hautagai bat bilatu beharko dute, ez dudalako nahi bat ez natorren pertsonek nire hauteskunde-programa egitea, eta hauteskunde-zerrendarekin gauza bera. Ez naiz txontxongiloa", ohartarazi du irratian eskainitako elkarrizketan.

Igande honetan El Mundo eta ABC kazetek argitaratu dutenez, litekeena da Aguirrek hautagai izateari oniritzia ematea, baina horren ordez, Madrilgo Presidentetza utzi behar izana. Hala ere, informazio hori ukatu du Aguirrek, Cospedalek eskaera egin baitzion ere, hark "kromo aldaketa horri" uko egin diolako.

"Ezetza eman nuenez, Hauteskunde-Batzordeak lau orduko geldiunea izan zuen", azaldu du. "Ni hautagai izatea nahi baldin badute, ezin dut alderdiaren Presidentetzako atzeko atetik alde egin. Baina hau zer da?", gaineratu du.

Buruzagi popularrak azaldu duenez, "Madrilgo Alkatetza lortuz gero, seguruenik ez nintzateke berriro PPko Presidentetzarako hautagai izango". Hala ere, PPk proposatutako eran ez duela kargua utziko iragarri du, "ez baita posible ni neu hautagai izatea, eta haiek hauteskunde-zerrenda eta hauteskunde-programa egitea, ezetz ba".

Madrilgo PPn duen boterearen beldur ote den PP nazionala galdetu diote Aguirreri, eta ez dakiela erantzun du. "Beharbada nik argi eta garbi hitz egitearen beldur dira", amaitu du.

PPk informazioa ukatu du

Bestalde, Alderdi Popularrak hainbat komunikabidetan argitaratutako informazioa ukatu du. PPk zabaldu duenez, PPko zuzendaritza nazionala eta Aguirre akordio batera heldu ziren: Madrilgo Alkatetza lortuz gero, Aguirrek Madrilgo PPko Presidentetza utziko zuela, "Madrilgo Udalean bakarrik lan egin ahal izateko".