Politika -
Auzitegi Nazionala
Mardaras frogarik ez zegoelako absolbitu zuten bigarrenez
Epailearen autoan agertzen denez, ez dago “frogarik akusatuak gertakarian parte hartu zuela” egiaztatzeko, PSE-EEren Bilboko egoitzaren aurkako atentatuaren harira.
agentziak | erredakzioa
Auzitegi Nazionalak frogarik ez zegoelako absolbitu zuen Ohiana Mardaras preso bilbotarra 2008an PSE-EEren Bilboko egoitzaren kontra egin zuten atentatuagatik.
Gaur kaleratu dute epailearen autoa, aurreko apirilaren 13an Auzitegi Gorenak Mardarasi EITBren egoitzaren kontrako atentatuagatik jarritako zigorra bertan behera utzi ostean. Auzitegi Nazionalak zigorra ezartzeko "intuizioetan" oinarritu zela argudiatu zuen Gorenak absoluzioa emateko.
Gaurko autoaren kasuan, berriz, PSE-EEren Bilboko egoitzaren aurkako atentatua zuten aztergai, eta Ministerio Fiskalak 66 urteko kartzela-zigorra eskatzen zuen bilbotarrarentzat eraso horretan parte hartzea egotzita.
Baina absolbitu egin dute Mardaras kalte terroristen eta lesioen kasuan, ez dagoelako "frogarik akusatuak gertakarian parte hartu zuela" egiaztatzeko.
Beobidek Poliziari esan ziona aurkeztu zuen fiskalak froga gisa, baina presoak bertsio hori gezurtatu egin zuen epailearen aurrean.
"Nahitanahiezkoa da inputatuak deklarazioa epailearen aurrean berrestea", gaineratu dute ebazpenean.
