Erkoreka: 'Denon artean ezabatu behar dugun patologia da ustelkeria'

Josu Erkoreka Eusko Jaurlaritzako Justizia sailburuaren iritziz, “oker daude” ustelkeria ordezkari politikoen aurka jaurtitzeko arma dela uste dutenak. “Gaitz kolektiboa da eta denon artean egin behar dugu ustelkeria ezabatzeko ahalegina”, adierazi du.

Erkorekak 'Ustelkeria politikoaren kontrako borroka: Estatuaren eta herritarren tresnak' izeneko uda-ikastaroa inauguratu du Donostiako Miramar Jauregian.

Ohartarazi duenez, “atsedenik gabe eta irmotasun osoz” aurre egin behar zaio ustelkeriari, “gure gizarteko patologia larria baita”.

Erkorekaren ustez, “botere publikoei” dagokie ustelkeriari aurre egitea, baina baita herritarrei ere. “Ustelkeriak politikagintzaren irudiari kalte egin, bizikidetza gaiztotu eta erakundeenganako konfiantza modu atzeraezinean suntsitzen du”, erantsi du.

Munduko “bost kontinenteetan” gertatzen den “errealitate unibertsala” da ustelkeria, Erkorekaren hitzetan. “Berdin da eskuineko, ezkerreko ala zentroko gobernuak izan”, esan du.

Brasil eta Txile adibide moduan jarri ditu Erkorekak. “Berreraketa politikoa aldarrikatzen duten Gobernuetan ere gertatzen da”, amaitu du.