Arraiz: 'Estatu espainiarretik irtetea higiene demokratiko kontua da'

Estatu espainiarretik irtetea higiene demokratiko kontua dela azpimarratu du Hasier Arraiz Sortuko presidenteak eta ezker abertzalea estrategia independentista zehazten ari dela gaineratu du.

Arraizek Sortuk Durangon antolatutako udako ikastaroen amaieran hitz egin du, eta independentzia lortzeko estrategia "birmoldatzea" eta "indartzea" proposatu du.

Sortuko presidentearen hitzetan, "katalanek beren etorkizun politikoa erabaki dezaten beharrezkoa da Euskal Herrian ere eskubide horren defentsaren inguruan antolatzea" eta baita euskal herritarrek prozesu eratzailea abian jartzea ere.

Ildo horretan, zera aldarrikatu du: "gure askatasunerako bidea irekita katalanen askatasunerako ateak zabalduko ditugu".

Bestalde, PP eta PSOE gogor kritikatu ditu Kataluniako prozesuaren aurrean izaten ari diren jarrerarengatik. Arraizen esanetan, a"lderdi politiko gisa jarduteari utzi eta Estatu aparatuko parte gisa jarduteari ekin diote" eta horren lekuko dira, haren ustez, Mariano Rajoyk eta Felipe Gonzalezek Kataluniako prozesuaren aurka egindako kritikak.