Politika -
LAU URTE E.T.A. GABE
'Bizikidetzarako akordioen espiritua berreskuratzea' nahi du Urkulluk
Lehendakariaren esanetan, ETAk "bide luzea egin behar du oraindik".
AGENTZIAK | ERREDAKZIOA
Iñigo Urkulluren esanetan, ETAk "bide luzea egin behar du oraindik", "guztiz armagabetu, eragindako min bidegabea aitortu eta desegin arte". Halaber, autogobernuaren, bakearen eta bizikidetzaren esparruetan, "bizikidetzarako akordio politikoen espiritua" berreskuratzearen alde egin du.
Agintariak harrera egin die Lehendakaritzan 17 autonomia erkidegoetako Justizia Auzitegi Nagusietako presidenteei eta Botere Judizialaren Kontseilu Nagusiko (BJKN) hainbat kideri. Josu Erkoreka Justizia sailburua ere izan da bertan.
Bere hitzaldian, lehendakariak berretsi egin du "akordioen espiritua" berreskuratu nahi duela, bai bakegintzan, bai bizikidetzaren alorrean.
Urkulluk garrantzitsutzat jo ditu Foru Lurraldeen eskubide historikoak, autogobernuaren "oinarria" baitira. Gainera, Gernikako Estatutuaren "akordioaren espirituaren gakoak" direla gaineratu du.
ETAren indarkeriaren amaierak lau urte egin dituela eta, talde armatuak "bide luzea" duela ibiltzeko nabarmendu du lehendakariak, eta "armagabetzea, eragindako min bidegabea aitortzea eta desegitea" aipatu ditu egin beharreko urrats gisa.
