Diezen amak Dependentzia Legeari heldu nahi diola berretsi dute

Rafa Diez Usabiaga LAB sindikatuko idazkari nagusi ohiaren amak Dependentzia Legeari heltzea eskatu duela azaldu dio Baltasar Garzon epaileari Lasarteko Udalaren (Gipuzkoa) Gizarte Gaietako zinegotzigo arduradun batek. Diez aske utzi zuten bere ama zaindu zezan.

Iturri juridikoen arabera, lekukoa magistratuak eskatuta joan da deklaratzera. Udalak apirilaren 12an igorritako agiria berresteko deitu du Udaleko arduraduna epaileak. Agirian, Usabiagaren amak "Dependentzia Legearen prestazioak eta zainketak eskatzeko izapideak" hasi dituela esaten da, "zaintzaile gisa bere semea aukeratuz".

Auzipetuaren amak osasun arazoak dituela ziurtatu dio epaileari lekukoak. Era berean, amak Dependentzia Legeari heltzea eskatu duela esan du Udaleko arduradunak. Hala ere, espedientea oraindik zabaldu ez dutela azaldu du, izan ere, prestazioak eskatzeko izapideak Udaleko gizarte-langilearekin bilera eskatuz hasten dira. Hori da Usabiagaren familiak eskatu duena, hain zuzen ere.

Udaleko Gizarte Gaietako arduradunak azaldu duenez, hitzordua ekainaren hasieran du Diezen amak, gizarte-langilearekin izan eta prestazioa eskatzeko espedientea hasiko da, baina momentuz hori da Udalak eskatzaileari igorri dion dokumentu bakarra.

Lasarteko Udalak iragan astean azaldu zuenez, hitzordu horretan eskatutako dokumentazio guztia aurkeztu beharko du Usabiagaren amak. Ondoren, gizarte-langileak espedienteari hasiera emango dio eta Gipuzkoako Foru Aldundiari igorriko dio. Era berean, Diputazioak mediku eta teknikari bat bidaliko ditu Diazen amaren etxera pazientea miatzeko eta baloratzeko.