ETAko ustezko kide bat atxilotu dute Frantzian

Ibilgailu baten lapurreta saiakeran parte hartzen ari zen gizon bat atxilotu du Frantziako Poliziak arratsaldean, eta atxilotu dutenean ETAko kide gisa identifikatu da, terrorismoaren aurkako borrokako iturriek jakinarazi dutenez.

Terrorismoaren aurkako borrokako iturriek jakitera eman dutenez, hiru lagun auto bat lapurtzen saiatzen ari zirenean atxilotu dute ustezko ETAko kidea, 19:00ak aldera.

Antza denez, atxilotuak pistola bat zeraman, eta Correzeko departamentuan atzeman dute, Tulleko hiritik gertu.

Vascopress albiste-agentziak jakinarazi duenez, lapurreta saiakeraren lekuko batek Poliziari abisua eman dio. Susmagarrietako bat harrapatzea lortu du patruila batek, eta gainerakoek ihes egin dute.

Ihes egindako lagunak atxilotzeko operazioa abian jarri du Frantziako Poliziak.

Smith-Wesson pistola bat

Atxilotuak Smith-Wesson pistola bat zeraman, eta nahiz eta ETAko kide zela aitortu, ez du izenik eman, iturri berdinen arabera.

Atxiloketa Saint Bonnet La Rivieren jazo da, Correzeko departamentuko herri txikia, Frantziako erdialdean. ETAko ustezko kidea eta beste bi lagun Renault Clio auto bat lapurtzen saiatu dira Saint Maixenten.

Ikerketako iturrien arabera, atxilotuak eta beste bi lagunek Renault Modus ibilgailu bat goizean lapurtu dutela uste dute.