Felipe VI.ak alderdiekin bilera erronda egingo du hilaren 24 eta 25ean

Felipe VI.a Espainiako erregeak alderdi politikoekin beste bilera erronda bat egingo du urriaren 24an eta 25ean, hautagairen batek inbestidura saioan aukeratua izateko adina babes ote duen ala ez egiaztatzeko. Hala ez bada, erregeak Gorteak desegingo ditu urriaren 31n.

Espainiako Errege Etxeak ohar bidez jakinarazi duenez, alderdi politiko bakoitzak erregearekin biltzeko aukeratutako pertsonen zerrenda bidaliko dio Ana Pastor Espainiako Diputatuen Kongresuko presidenteak Felipe VI.ari. Errege Etxeak hilaren 20an bertan bidaliko dio Pastorri bileren egutegia eta Kongresuak hurrengo egunean, hilaren 21ean, emango die hitzorduen berri alderdi politikoei.

Bilera erronda amaitutakoan inbestidurarako hautagairik balego, Pastorri legokio inbestidura saioa deitzea. Espainiako presidentea aukeratzeko epea urriaren 31n amaitzen dela kontuan izanda, litekeena da balizko inbestidura saio horrek Iberoamerikako goi-bilerarekin kointziditzea; izan ere, hilaren 28an eta 29an egingo da Cartagena de Indiasen (Kolonbia).

Felipe VI.a erregeak ez luke goi-bilera horretan parte hartzeko arazorik izango; bai, ordea, Mariano Rajoy jarduneko Espainiako Gobernuko presidenteak.