Politika -
Akordioa
Frantziak Espainiaren esku utziko du ETAri konfiskatutako materiala
1999tik aurrera Parisko Auzitegiak ikertutako kasuetan atzemandako objektuak eta dokumentuak Espainiako agintariei igorriko die Frantziak.
Agentziak | Erredakzioa
1999. urtetik aurrera Parisko Auzitegian epaitutako kasuetan ETAri konfiskatutako objektuak eta agiriak Espainiako agintarien esku utziko du Frantziak.
Frantziako eta Espainiako Justizia eta Barne ministroek sinatu dute akordioa, bi herrialdeek Malagan egin dute goi-bileran.
Batzarra amaituta, Mariano Rajoyk eta François Hollandek agerraldia egin dute eta biek itunaren garrantzia azpimarratu dute.
Rajoyk esan du “Frantziarekin urte luzeetan izandako elkarlanaren ondorioz bildutako material ugari” jasoko duela Espainiak.
ETAren biktimen “oroimena eta duintasuna aitortzeko bidean aurrera jarraitzea ahalbidetuko du”, adierazi du.
Rajoyk jakinarazi duenez, Gasteizko Biktimen Memoriarako Zentroan gordeko dituzte Frantziak emandako agiriak.
Bestalde, Hollandek esan du itun hori Frantzia eta Espainiaren arteko “konfiantzaren adierazle” dela eta ziur agertu da terrorismoaren kontrako borroka oroitzeko lagunduko duela.