PSEk 'ezinbestekotzat' jo du bere burua, alderdiaren 40. urteurrenean

PSE-EEk orain dela 40 urte egin zuen lehen kongresua, eta urteurren hori ospatu dute Euskadiko sozialistek gaur. Lau hamarkada horietako "askatasuna eta bakea lortzeko konpromisoa" azpimarratu dute, Euskadiko etorkizunerako alderdia "nahitaezkoa" dela nabarmentzeaz gain. PSOEk bizi duen "garai zaila" ere aipatu dute Kursaalen egindako ekitaldian bildutako militanteek.

"Guztiok harro gaude iraganean eskubideak lortzeko ezinbestekoa izan den alderdiaren militanteak izateaz". Hala ere, gaur egun ere funtsezko alderdia dela aldarrikatu dute, orain arte lortutako eskubide horiek bermatu eta hedatzeko. "Harro gaude, halaber, etorkizunean ere Euskadin nahitaezkoak izango garela jakiteaz", adierazi du Idoia Mendia PSE-EEren idazkari nagusiak Donostiako agerraldian.

Ramon Jauregi, Nicolas Redondo Terreros eta Patxi Lopez idazkari nagusi ohiak bildu dira gaur eguerdian Donostian, Kursaal jauregian. "Txiki" Benegas gogoan izan dute, PSEko lehen idazkari nagusia.

1977ko martxoaren 12an Donostiako Igeldo mendian antolatutako lehen kongresua gogoratuz hasi dute ekitaldia, bideo baten bidez. Ekitaldian parte hartu duten militanteak zutik jarri dira terrorismoaren ondorioz hildako kideen irudiak agertu direnean.

PSOEren krisia

Gaur egun PSOEk bizi duen "garai zaila"ri buruz hitz egin du Patxi Lopezek. "Sozialistak inoiz baino beharrezkoagoak dira", esan du.

Jon Larrinaga Euskadiko Ezkerrako idazkari nagusi izandakoak hitz egin du irmoen PSOEren krisiari buruz. "Ez dut inoiz ikusi bere kabuz halako nahaspilan sartu den alderdirik. Ezin da idazkari nagusi bat aukeratu, eta handik astebetera, zenbait federaziotan trabak ipintzen hasi", aitortu du.

Ramon Jauregik, iragana izan du hizpide batetik, alderdiaren "historia luzea, epikoa eta zoragarria" azpimarratzeko; bestetik, berriz, orainaz ere aritu da hizketan, apirilaren 8an Baionan egingo den ETAren armagabetzeari erreferentzia eginez. Antzerti-forma emango diotela adierazi du.