Zortzi urteko inhabilitazioa eskatu dute Erandioko alkatearen aurka

Fiskalak eta akusazio partikularrak zortzi urte eta erdiko inhabilitazioa eskatu dute Joseba Goikouria (EAJ) Erandioko alkatearen aurka omisiozko prebarikazioa leporatuta, txatartegi bati baimenik gabe 14 urtez jarduten uzteagatik.

Ebazpenaren zain geratu da gaur Bilbon egindako epaiketa, eta Goikouriaren ondoan Asier San Nicolas eta Itziar Koba Hirigintzako zinegotzi ohiak ere eseri dira aulkitxoan, eta horien kontra zigor bera eskatu dute, nahiz eta gaur egun ez duten kargu publikorik.

Gorka Martinez akusazio partikularraren abokatuak txatartegiaren ondoko lur-eremuaren jabeak ordezkatu ditu. Kaltetu gisa salatu dute alkatea, lur-eremuan pabilioi bat eraikitzeko baimena eskatu arren sekula jaso ez zutelako.

"Recuperaciones Esmak euren batzokitik 100 metrora egiten zuen lan eta ikusi egiten zuten", adierazi du abokatuak. "Benetan zekiten zer gertatzen ari zen Erandioko inguru horretan", gaineratu du.

Joseba Goikuria alkatearen defentsa abokatuak, berriz, kritikatu du akusazioek ez dutela egiaztatu alkateak txatartegia legez kanpo ari zela zekienik 2014an kereila aurkeztu baino lehenago.