F.Diazek aurkariak jazartzeko Polizia erabili zuela adierazi du Kongresuak

Jorge Fernandez Diaz Espainiako Barne ministro zen garaian Poliziaren erabilera politikoa egin ote zen argitzeko Diputatuen Kongresuan osatutako Ikerketa Batzordeak ondorioztatu duenez, Polizia aurkari politikoak jazartzeko erabili zen eta Ministerioko arduradunek aldetik "botere-abusua" egon zen.

Batzordearen gehiengoak ondorioen txostena adostu du, PPren kontrako botoekin, Ciudadanosen abstentzioarekin eta zazpi boto partikularrekin.

Txostenaren arabera, Fernandez Diaz Espainiako Barne ministro zen garaian egitura bat osatu zuten Alderdi Popularrari eragiten zioten ustelkeria kasuen ikerketa oztopatzeko —Eugenio Pino Poliziaren buruetako zenaren aginduz, Ignacio Cosido Poliziako zuzendari ohiaren jarraibideak jarraituz eta Jorge Fernandez Diaz ministro ohia jakitun zela—.

Halaber, sortutako egitura hori aurkari politikoak (PSOE, Podemos eta Kataluniako nazionalismoa, kasu) ikertzeko eta jazartzeko erabili zuten.

Ikerketa Batzordeak adostutako testuaren arabera, Barne Ministerioroko baliabideak, bitartekoak eta Estatuko Segurtasun Indarrak PPren mesedetan eta helburu politikoak lortzeko baliatu ziren, demokraziaren eta Zuzenbide Estatuaren oinarrizko arauak urratuz.