ETA eta ezker abertzalea agintea lortzeko lehian, Mendiaren ustez

Idoia Mendia Eusko Jaurlaritzaren bozeramaileak adierazi duenez, "badirudi gatazka bat dagoela ETAren eta ezker abertzalearen artean nork aginduko" eta ohartarazi du "demokrazian aritu nahi badu" pausoak ematen jarraitu beharko duela eta ETAk indarkeria utzi beharko duela. Hala ere, ez du uste sektore politiko horrek datozen hauteskundeetan parte hartzeko aukerarik duenik.

Mendiak ETBn egin dioten elkarrizketan Gernikako adierazpena izan du hizpide. Mendiak uste du dokumentuaren sinatzaileentzat ere ETAk dioena ez dela "nahikoa" eta, ondorioz, "haientzat oinarrizkoa dena eta erakunde terroristak ulertzen ez duena" esan behar izan dutela.

Eusko Jaurlaritzaren bozeramaileak berretsi du alderdi guztiek eskatzen dutela terrorismoa amaitzea, baina "hori da ETA oraindik egiteko prest ez dagoena, badirudi bakearen gainean agintzen jarraitu nahi dutela, eta hori onartezina da".