Iñaki Arriola izango da PSE-EEko presidente berria

Iñaki Arriola sozialista aukeratuko dute PSE-EEko presidente, alderdi horrek datorren asteburuan Bilbon egingo duen VIII. Kongresuan. Eusko Jaurlaritzako Ingurumen, Lurralde Plangintza eta Etxebizitza sailburua da egun politikari eibartarra.

PSE-EEk jakitera eman duenez, Idoia Mendia alderdiko idazkari nagusiak berriro berreskuratu nahi izan du presidente kargua Zuzendaritza Batzordearen egituran, duela hiru urteko Kongresuan kentzea erabaki ondoren.

1988tik 2002ra Jose Maria 'Txiki' Benegasek bete zuen PSE-EEko presidente kargua, eta hura hil zenean, Jesus Eguigurenek hartu zuen lekukoa, 2014ra arte.

Arriola Gipuzkoako sozialisten presidente izan zen ia hamar urtez, eta ekainean, primarioetan, kargu horretara ez zela aurkeztuko iragarri zuen.

Ohorezko kargua

Iazko azarotik, Eusko Jaurlaritzako sailburua da Arriola, eta kargu horretan jarraituko du. PSE-EEko presidente kargua ez da exekutiboa, ohorezkoa baizik, alderdiko iturrien arabera.

Primarioetan beharrezko abalak lortu ondoren, Idoia Mendia aukeratuko dute berriro Euskadiko sozialisten idazkari nagusi datorren asteburuan. Mendiak argitu duenez, Pedro Sanchez PSOEko burua sustatzen ari den eredua jarraitu nahi du, alderdiaren egiturak zabalduz.