Fiskalburua ETAri buruzko datuak biltzen ari da Kolonbian

Javier Zaragoza Auzitegi Nazionaleko fiskalburua ETAko kideen presentziari buruz datuak biltzen ari da Kolonbian. Era berean, Kolonbiako Indar Armatu Iraultzaileen (FARC) eta erakunde terroristaren arteko lankidetzari buruzko informazioa biltzen ari da fiskalburua.

Candido Conde-Pumpido Estatuko fiskal nagusiak Senatuan azaldu duenez, Kolonbiako bidaia "beharrezko informazio guztia biltzeko" aprobetxatuko du Zaragozak. Fiskalburua Nazio Batuek antolatutako terrorismoaren inguruko biltzar batean parte hartzen ari da Bogotan, egunotan.

Victor Julio Suarez Rojas Mono Jojoy FARCeko buruzagi militar ohiaren ordenagailuko datuak emateko Kolonbiako agintariei laguntza eskatzeko esan zion atzo Ministerio Publikoak Eloy Velasco Auzitegi Nazionaleko epaileari, Conde-Pumpidok gogorarazi duenez.

Fiskal nagusiak Javier Rojo Senatuko presidenteari Fiskaltzaren Memoria eman dio gaur. Ministerio Publikoak Arturo Cubillas ETAko kidearen aurkako kereila aurkeztu zuen aspaldi, adierazi du Conde-Pumpidok. Erakunde terroristako zenbait kideren aitorpenaren arabera, trebakuntza jaso zuten Venezuelan Cubillasen eskutik. Cubillas kargudun publikoa da Venezuelan.

Enpresari bat bahitzeko egitasmoa

Bestalde, Imanol taldeko ustezko kideek Irungo (Gipuzkoa) enpresaburu baten etxebizitza eta enpresa zelatatu zituzten 2009ko bukaeran. Dirudienez, enpresariak ez zuen estortsioa ordaindu, Poliziako iturrien arabera, eta bere aurkako eraso bat prestatzen ari ziren.

Ibai Beobide ETAko kide "liberatua" Gipuzkoara heldu zenean jarri zuten martxan egitasmoa, erakunde terroristaren Gipuzkoako egitura berrantolatzeko xedearekin.