Erreferendum adostua programan sartzea proposatu die En Comú-Podemek independentistei

Abenduan izango diren Kataluniako hauteskundeei begira, "adostutako erreferenduma" hauteskunde-programan sartzea proposatu die Elisenda Alamany Catalunya En Comú-Podemeko alderdikideak Kataluniako alderdi independentistei, hala nola ERCri, JuntsXCati eta CUPi.

"Utziezina da adostutako erreferenduma, ez Catalunya En Comú-Podemek esan duelako, Kataluniako gehiengo batek hala diolako baizik, baita PSCren, Csen eta PPren jarraitzaileen artean ere", esan du Alamanyk Europa Pressi eskainitako elkarrizketa batean.

Aurretik hauteskunde-programa guztietan bi auzi sartzea proposatu zien En Comú-Podemek: 155. artikuluaren baliogabetzea eta espetxeratutako kontseilari ohiak eta buruzagi independentistak aske uzteko eskaera. Orain, hirugarren proposamena helarazi die, Espainiako Estatuaren eta Generalitatearen artean adostutako erreferenduma, hain zuzen ere.

Alamanyk azaldu duenez, independentismoaren aldebakartasunak "porrot egin duen estrategia ekarri du", azken egunotan buruzagi independentistek hala aitortu duten bezala. "18 hilabete hauetan sinbolikoki asko egin dugu aurrera (Errepublikaren aitorpena), baina autogobernuari dagokionez, azken 40 urtetan lortutakoarekin atzera egin dugu", Espainiako Gobernuak ezarritako 155. artikuluari aipamena eginda.