Kataluniaren erabakitzeko eskubidearen aldeko martxa egin dute Baionan

Kataluniako prozesu independentistari babesa erakusteko manifestazioa egin dute larunbat arratsalde honetan Baionan, EH Baik deituta. 'Kataluniarekin bat. Democratie et autodetermination' lemapean manifestatu dira 500 bat lagun, eta bere etorkizuna erabakitzeko Kataluniak duen eskubidea babestu nahi izan dute.

"Kataluniako Gobernu legitimoaren parte bat preso sartuz, Madrilek etapa berria gainditu du errepresioaren bidean", salatu dute martxaren antolatzaileek, EH Baiko ordezkariek. Gainera, Espainiako Gobernuaren "jarrera arduragabea" kritikatu dute, eta "europar erkidegoaren isiltasun jasanezina" ere.

Antolatzaileen hitzetan, Kataluniako herriak "era baketsuan adierazi duen borondatea" errespetatu egin behar da. Hori dela eta, babesa adierazi diote Errepublika aldarrikatzeko Kataluniako Parlamentuak egindako erabakiari.