Politika -
Elkarrizketa Radio Euskadin
Ezenarro:'Batasuna hauteskundeetan egongo da haren apustua irmoa bada'
Aralarreko legebiltzarkideak bide politikoen aldeko apustuari eusteko eskatu dio ezker abertzaleari, "oztopoak oztopo".
Erredakzioa
Aintzane Ezenarro Aralarrek Eusko Legebiltzarrean duen bozeramaileak adierazi du legez kanpoko ezker abertzalearen bide politikoen aldeko apustua "irmoa" bada, politikan parte hartu ahal izango duela.
Gaur goizean Radio Euskadin egin dioten elkarrizketa batean, baina, Aralarreko legebiltzarkideak ohartarazi du balitekeela "saiakerak" egotea Batasunaren urrats hori "oztopatzeko".
"Nahi dudan gauza bakarra Batasunak apustu horri irmo eustea da, hurrengo hilabeteetan edo urteetan ikusiko ditugun oztopoak oztopo", gaineratu du.
Ezenarroren ustez, ezker abertzalearen apustua irmoa bada eta aurrera egiten badu, "politikan egongo dira".
EAEko Aurrekontuak
Bestalde, legebiltzarkide abertzaleak nabarmendu du PPk Eusko Jaurlaritzan inor ez duen arren, "Gobernuan" dagoela, eta 2011ko Aurrekontuak onartu baino lehen "PPren iragazkitik" pasatu behar izatea jarri du horren adibide.
"PP Gobernu honen Aurrekontuetan dago", berretsi du.