Ibarretxe: 'Erabakitzeko eskubidea konponbidearen giltza da'

Nortasunean sakontzea eta erabakitzeko eskubide adostua irtenbidearen "giltza" direla esan du gaur Juan Jose Ibarretxe lehendakariak Bilbon.

"Herri gisa zure nortasunean, kulturan eta hizkuntzan sakontzea ez dago egitasmo politiko legitimo baten atzean soilik, proiektua autonomia, burujabetza edo Espainiaren batasuna izan, berdin zait. Zure nortasunean sakontzea ekonomiaren atzean dago ere", azaldu du Ibarretxek.

Koldo Ordozgoitik idatzitako El futuro nos pertenece. Memorias politicas del lehendakari Ibarretxe liburuaren aurkezpenean, "zure nortasunean eta erabakitzeko eskubidean sakontzea konponbidearen giltza dira, zalantzarik gabe", adierazi du Gasteizko Exekutiboko buruzagi ohiak. "Etorkizuna nortasuna da, ez da iraganeko kontua, modernoa da", azaldu du lehendakariak.

Bizkaiko Foru Artxiboa jendez lepo izan da ekitaldian. Besteak beste, Miren Azkarate eta Idoia Zenarruzabeitia Ibarretxeren gobernuko sailburu ohiak izan dira bertan. Era berean, Andoni Ortuzar BBBko presidentea, Jose Luis Bilbao Bizkaiko diputatu nagusia eta Ana Madariaga Batzar Nagusietako presidentea Ibarretxerekin izan dira.

Euskal Herriaren "benetako" Konstituzioa eskubide historikoak direla defendatu du Ibarretxek. Eskubide historiko horiek ezin daitezke ezabatu, lehendakariaren esanetan, Euskal Herria ezabatzen baldin ez badute. "Euskal Herria existitzen da, eta demokratikoki eta askatasunean erabakitzeko eskubidea du", erantsi du.