Trebiñuko zerbitzuak hobetzeko akordioa egin dute Arabako eta Burgoseko diputazioek

Arabako Foru Aldundiak eta Burgosko Diputazioak Trebiñuko herritarrei zuzendutako zerbitzuak hobetzeko ituna sinatu dute gaur eguerdian egindako ekitaldi batean.

Bi administrazioek elkarlanean aritzea adostu zuten iaz, Trebiñuko herritarren mesedetan, eta akordio hura osatzen du gaur sinatutako hitzarmenak.

Guztira, zazpi akordio sinatu dituzte eta esparru ezberdinetan arituko dira elkarlanean: babes zibilean eta larrialdi zerbitzuetan; adinekoen, desgaituen edo mendekotasuna duten pertsonen arretan eta integrazioan; indarkeria matxistari aurre egiterakoan eta berdintasun politikak lantzerakoan; udalek sustatutako azpiegiturak eta ekipamenduak zaintzeko eta berritzeko proiektuetan; euskararen irakaskuntza eta erabilera sustatzerakoan; jarduera kulturalak eta hezkuntza bultzatzerakoan; eta gazteriari lotutako egitasmoak eta jarduerak abiarazterakoan.