Funosas: 'Hurbilketek erakusten dute adostasuna lortu dela Frantziarekin'

ETAren armagabetzearen urteurrenaren harira, Bakegintza Foroa egiten ari dira egunotan Biarritzen, Bake Bideak deituta. Presoei buruzko saioa egin dute goizean, eta Ipar Euskal Herriko ordezkaritza batek Frantziako Gobernuarekin abian duen lan esparruak orain arte emandakoaren balantzea egin dute. Aurrera begirako urratsak ere zehaztu dituzte.

 

Sei bilera egin dituzte ETAk armak entregatu zituenetik Frantziako Justizia Ministerioarekin, eta aldi berean, presoekin ere bilerak egin dituzte espetxeetan. Anaiz Funosae Bake Bideaneko eledunak nabarmendu duenez, egoera "desblokeatzea" lortu dute, eta horri eskerrak, "aurrerapausoak" ematen ari dira.

 

Azken hilabeteotan bederatzi preso gerturatu ditu Frantziako Gobernuak Euskal Herritik gertu dauden espetxeetara, eta laster gerturatze gehiago egotea espero dutela zehaztu du Funosases. "Egon dira espekulazio aunitz. Guk ez du onartu joko horretan sartzea. Egia dena da adostasuna lortu dela. Kriterioa izan da legearen aplikazioa eta eskaera indibiduala egitearena", esan du.

 

Frantziako Gobernuarekin zabalik duten lan espazioa "oso positiboki" baloratzen dutela esan du. "Ezinbestekoa da indarrez adierazi diezaiogun honek ez duela urte luzez irauten ahal. Hori da gure erantzukizuna. Delegazio gisa ezin dugu utzi denbora pasatzen. Presa bada gauzak martxan jartzeko, eta guztiak martxan jartzeko", zehaztu du.

 

Frantzian diren preso guztiak Euskal Herrira hurbildu arte lanean jarraituko dutela gaineratu du Bake Bidean taldeak. Emakume presoen egoera aipatu dute bereziki, Lannemezango eta  Mont-de-Marsangoan espetxeetan ez baitago emakumezkoentzako egokitutako espaziorik. Egoera horri konponbidea emateko lanean ari direla ere esan du Funosasek.