Jauregui:'Ordainduko ez dugun prezioa jarriko dio ETAk bere bukaerari'

ETAk ez du indarkeriaren amaieraren "albistea emango", uste du Ramon Jauregui Presidentetzarako ministroak. Horren hitzetan, "bere bukaerari prezioa jarriko dio, baina ez gaude hori ordaintzeko prest".

ETArengandik espero dugun ohar bakarra erakundearen amaiera iragartzen duena baino ez da, adierazi du Jaureguik ETBko ''Egunon Euskadi'' saioan emandako elkarrizketan. Horren aburuz, "hori ez da iritsiko" eta ETAk ez du "utziko dugu", "gure erakundea desegingo dugu eta bakea ezarriko dugu" jasotzen duen dokumentua kaleratuko.

Jauregiren arabera, "askoz ere anbiguoagoak izango dira eta su-etena luzatzeko hitz leungarriak erabiliko dituzte" eta gainera, ETAk "demokraziak onartu ezin dezakeen prezioa jarriko dio bere bukaerari".

Edonola ere, "esango dutenaren gainean hainbeste ez espekulatzeko eta egiten ari direna aztertzeko" agindu du ministroak. "Orain dela egun batzuk, material informatikoa lapurtu zuten Frantzian eta oraindik, zerga iraultzailea eskatzen zaie enpresariei", gogorarazi du.

Udal-hauteskundeak

Jaureguik iragarri duenez, hurrengo udal hauteskundeetan eta autonomikoetan "gerta ala gerta", Jose Luis Rodriguez Zapateroren Gobernua "2012ko martxora arte, agintaldia bukatu arte jarraituko du".

Horren harian, krisialdi ekonomikoak maiatzeko hauteskundeetako boto-asmoan eta emaitzetan eragina izan lezakeela azaldu du ministroak.

"Agerikoa da, krisialdiak mundu osoko gobernuei egoera politikoa ahula inposatzen diela eta jasan beharko dugula", zehaztu du.

Dena den, "emaitza edozein dela ere" eta "gerta ala gerta, Jose Luis Rodriguezen Gobernua 2012ko martxora arte jarraituko du". Horrela, "herrialdea berpizkundearen bideak jartzeko erreformen eta egitasmoen politika" gauzatuko du, "Gobernua, proiektua, eta gehiengo parlamentarioa" dagoelako.

Horrez gain, PSOE "Jose Luis Rodriguez Zapatero berriz presidentetzarako hautagaia izateko" lanean dabilela baieztatu du, baina lortzen ez badugu, "PSOEren kongresu batek hautatuko du".

Pentsio-sistemen erreformaren gainean Jaureguik esan du "azken unera arte" sindikatuekin akordioa egiteko negoziatzen jarraituko dutela. Dena den, gainerako herrialde europarretan bezala "erreforma hori egin behar" dela ohartarazi du. Presidentetzarako ministroak azpimarratu duenez, Exekutiboak etorkizunean pentsioak izatea bermatu nahi du eta hori "utziezina da".