Erkidegoak 'Estatu txiki' bihurtu nahi direla kritikatu du Aznarrek

Espainiako zenbait Autonomia Erkidego "Estatu txikiak" bihurtu nahi direla salatu du gaur Jose Maria Aznar presidente ohiak. Egoera horretan, Espainiak bai Europa mailan eta baita mundu mailan ere lehian aritzea "zail" izango duela gaineratu du Aznarrek.

FAES fundazioko ekitaldi batean egin ditu Aznarrek adierazpenak. Bertan, Autonomia Erkidegoen ereduaren inguruan mintzatu da Espainiako buru ohia.

Bere ustez, erkidegoak "ez dira arazo", baina erkidegoek "arazoak dituzte", eta horretarako "egungo ereduaren erreforma beharrezkoa da".

Erkidegoen ereduaren "erreforma sakona" eskatu du Jose Maria Aznarrek, besteak beste, Alemaniak egindako gestio eredua abian jartzeko.

Hiru arrazoi eman ditu Aznarrek eredu hau justifikatzeko: "Espainia, Europako egitasmoaren protagonista izaten jarraitzea, ongizatearen gizartea berrestea eta 1978ko Konstituzioa indarrean dagoela erakustea". Azken finean, "Espainiar nazioak bere etorkizuna erabakitzeko duen eskubidea babestea", bere hitzetan.