Politika -
Proposamena
Tortura kasuei aurre egiteko laguntza eskatu die EAk erakundeei
Ustezko tortura kasuetan akusazio partikular gisa aurkezteko eta salaketa ipintzen dutenei ekonomikoki laguntzeko eskatu die Eusko Alkartasunak Aldundiei eta udalei.
Erredakzioa
Aldundiek eta Udalek ustezko tortura kasuetan akusazio partikular gisa aurkeztu eta salaketa ipini dezaten hainbat ekimen aurkeztuko ditu Eusko Alkartasunak Batzar Nagusietan eta udaletxeetan.
Juanjo Agirrezabala Eusko Alkartasunako legebiltzarkideak aurkeztu du proposamena. Mozioetan Espainiako Gobernuari Torturaren Aurkako Elkarteak tratu txarren kontra egindako dekalogoa betetzea eskatuko dutela gaineratu du Agirrezabalak.
Atxilotuen tratu txarrak sahiesteko EAJ-k Arartekoak egindako gomendioen inguruan egindako ez-legezko proposamenari zuzenketa bezala aurkeztu du EAk dekalogoa. Joan den astean, Bizkaian, ustez ETAko Otazua komandoko kide izateagatik atxilotu zituzten lau kideek jarritako tortura salaketen harira aurkeztu ditu EAk gaurko proposamenak.
"Tortura guztien jatorrian" inkomunikazioa dagoela salatu du Agirrezabalak eta horren defentsa egitea komisaldegietan tratu txarrak "defendatzea" esan nahi duela gaineratu du.
Giza Eskubideen Europako Auzitegiak tortura kasu bat ez ikertzeagatik Espainiari jarritako isuna ere gogoratu du Juanjo Agirrezabalak.
