Politika -
Fiskal buruaren ustez
'Konstituzionalaren erabakia ez da hauteskundeak baino lehen etorriko'
EAEko Justizia Auzitegiko fiskal buruak uste du Konstituzionalaren aurrean "argi utzi behar dutela Batasunaren ondorengoak ez direla, nahiz eta pertsona berberak izan".
Erredakzioa
Auzitegi Konstituzionalak Sorturi buruz hartu beharreko erabakia maiatzeko hauteskundeak baino lehen hartzea "oso zaila" izango dela esan du Juan Calparsoro EAEko Justizia Auzitegiko fiskal buruak.
Auzitegi Gorenak atzo iragarri zuen erabakiaren zergatiak oraindik ezagutzen ez direla gogoratu du Calparsorok (Estatuko Abokatutzaren eta Fiskaltzaren salaketak onartu zituen, eta Sortu legez kanpo utzi zuen).
Horrez gain, Goreneko epaileek erabakia aho batez hartu ez zutela azpimarratu du fiskal buruak. "Sorturen abokatuek ezaugarri hori erabiliko dute Auzitegi Konstituzionalaren aurrean, haien egoera (Sorturen egoera) hobea delako", azaldu du.
Carpalsororen esanetan, "argi dago" ETAren indarkeria gaitzestea "ez dela nahikoa izan" Sortu alderdi politiko legala izateko.
"Auzitegi Konstituzionalaren aurrean argi eta garbi utzi behar dute Batasunaren ondorengoak ez direla, nahiz eta pertsona berberak izan: hor dago koxka; Batasunarekin eten egin dutela probatu, eta legea bete nahi dutela sinistarazi", azaldu du.