Pasaiako segadako biktimak omendu dituzte Azpeitian, hilketaren 35. urteurrenean

Pasaiako Sarraskia Argitu plataformak deituta, larunbat honetan omenaldi egin zieten Azpeitian, Pedro Mari Isart Pelitxo, Rafael Dalas Txapas, Dionisio Aizpuru Kurro eta Jose Mari Izura Pelu, 1984ko martxoaren 22an Polizia espainiarrak Pasaian hil zituen Komando Autonomo Antikapitalistetako lau kideei.

35 urte geroago, eta bide judiziala agortuta, ez da arduradunik epaitu, eta hilketak argitu gabe egoten jarraitzen du.

Beste urte batez, biktimen senideek eta lagunek poema eta abestiekin gogoratu dituzte, "justizia" eskatu dute eta "egia ezagutu beharra" dagoela aldarrikatu dute.

Pasaiako segadako lau biktimez gain, Estatuak eragindako biktima gehiago omentzeko ere balio izan du ekitaldiak.

Josu Muguruza, Madrilen hil zuten HBko parlamentarioaren alaba Ane Muguruzak hitza hartu eta Estatuaren krimenek izan duten "inpunitatea" salatu du: "Euskal Herriko zenbait erakunde publikok norabide horretan urratsak eman badituzte ere, oraindik bide luzea dago egiteko egun bizi dugun diskriminazioa gainditzeko, eta behingoz, Estatuak sorrarazi duen sufrimendu guztia aitortzeko".