Beste sumario batzuetan auzipetutakoen babesa jaso dute 11/13 auziko 47ek

Irailaren 14an Bilbon egingo duten manifestaziora joateko deia egin dute 11/13 auzian epaituko dituzten 47 pertsonek, beste sumario batzuetan auzipetutakoen babesarekin egindako agerraldi batean.

47 pertsona epaituko dituzte Auzitegi Nazionalean, irailaren 16aren aurretik, presoen defentsa egin eta laguntza ematen dien sarea osatzea egotzita. 11/13 auzian Euskal Herrian saretu den jarduera politikoa epaitu eta zigortu nahi dela azpimarratu dute.

Haizea Ziluaga eta Imanol Karrera auziperatuek egin dute Azpeitian (Gipuzkoa) epaiketaren gaineko "irakurketa politikoa". "Errepresioak eta espetxe politikak sortutako sufrimendua arintzen laguntzeko konpromisoa" berretsi dute, eta bere garaian salatutako "urraketak eta aldarrikapen berberak" mantentzen direla esan dute.

"Errealitate horiek ezagutzera ematea, indarrak batzea eta mobilizazio sozial handi bat antolatzea izan zen gure lana", azaldu dute.

Beren ustez, beharrezkoa da "euskal presoak eta iheslariak etxera ekartzea", eta hori eskatuko dute Bilboko manifestazioan, Giza eskubideak, askatasuna, etorkizuna. Herrian lelopean.

Azpeitian (Gipuzkoa) egin duten agerraldian izan dira, bestek beste, Martxelo Otamendi (Egunkaria auzia), Iñaki Uria (Egunkaria auzia), Miren Odriozola (Udalbiltza auzia), Oihana Agirre (Amnistiaren Aldeko Mugimendua auzia), Carlos Trenor (18/98 auzia), Jon Telleria (Segi auzia), Ino Galparsoro (ANV auzia), Joseba Permach (Batasuna auzia), Idoia Ayastui (EHAK auzia), Amaia Izko (11/13 auzia), Mati Iturralde (medikua), Aitor Ibero (abokatua), Saioa Agirre (torturatua), Tomas Karrera (preso ohia), Mari Angeles Artola (erbesteratu ohia), euskal presoen senideak eta Ramon Oñederra GALen biktimaren senideak.