Ezker Abertzalea: 'Orain Sortu legeztatzeko ordua heldu da'

Bildu koalizioak lortu dituen emaitza "izugarriek" ezker abertzalearen "apustu politikoari" babesa eta "zilegitasuna" eman diotela nabarmendu dute gaur Txelui Moreno eta Marian Beitialarrangoitia ezker abertzaleko ordezkariek.

Batasuneko bozeramaile ohiek prentsaurrekoa eskaini dute Donostian udal eta foru hauteskundeetako emaitzak baloratzeko. Morenorekin eta Beitialarrangoitiarekin batera, Rufi Etxeberria, Miren Legorburu, Marine Pueyo eta Niko Moreno izan dira.

Orain "bi urte" iragarritako "estrategia politikoak" Euskal Herrian "aro politiko berri bat ireki" duela nabarmendu dute. "Independentziaren alde" indarrak batzeko aukera ere zabaldu dela gaineratu du Txelui Morenok.

Orain, ezker abertzalearen ustez, Sortu "legeztatzeko" garaia da, baita "espetxe politika aldatzeko" eta alderdien arteko elkarrizketak hasteko.

Espainiako Gobernuari "errepresioarekin bukatzeko" exijitu dio, eta Euskal Herriko "etorkizun politikoa" erabakiko duen alderdien arteko mahaia martxan jartzeko garaia heldu dela adierazi du.

Presoak eta itunak

"Gatazkaren ondorioei" buruz ETAren eta Gobernuaren arteko negoziaketa bat hastea eskatu dute agintari independentistek, erakunde terroristaren presoak Euskadira itzultzea ahalbidetzeko. Ezker abertzaleko buruzagiak Bilduren hauteskunde festan izan ziren atzo, Donostiako Atano III frontoian.

Itun posibleak edo Bildu ez gobernatzeko beste alderdien arteko akordioak kudeatzea koalizioaren beraren eskuetan dagoela adierazi dute ezker abertzaleko agintariek. Batasunaren eskuetan ez dagoela gogorarazi eta ezker abertzalearen estrategia politikoan eragin zuzenik ez duela izango erantsi dute.