Politika -
Gipuzkoa
PSEk ez du Aldundian Olano babestuko EAJk Gascoren kontra egiten badu
Gipuzkoako sozialisten buruak erantzun horixe eman dio Egibarri, Donostiako Udalean hautagai sozialistarik ez dutela babestuko iragarri ostean.
Erredakzioa
Iñaki Arriola PSE-EEren Gipuzkoako buruak iragarri du EAJri Gipuzkoako Aldundiko "zikloa amaitu" zaiola hitz emandakoa betetzen badu eta Donostiako Udalean hautagai sozialista babesten ez badu.
Arriolak Joseba Egibar EAJren Gipuzkoako presidenteak egindako adierazpenei erantzun die horrela. Egibarrek, Bildurekin batzartu ostean, Donostiako Udalean ez zuela hautagai sozialistarik babestuko iragarri zuen.
Egibarrek esan zuen PSE-EErenak egin duela hiriburuko Udalean eta argi adierazi zuen "hautagai sozialista alkate izateko modu bakarra" dagoela: "Bilduk botoa ematea".
PSE-EE bigarren indarra da Donostian 7 zinegotzirekin, Bilduk baino ordezkari bat gutxiagorekin, eta agintea lortzeko borrokatuko du, baina horretarako EAJren eta PPren babesa behar du.
Arriolak gogora ekarri duenez, hauteskunde egunetik PSE-EEk itun "globala" eskaini die EAJri eta PPri Gipuzkoako udal guztietan, Donostiakoan eta Errenteriakoan besteak beste, eta baita Aldundian ere.
Hori dela eta, ekainaren 11n, udalak osatzeko epemugan, itunik lotzen ez badute eta EAJk Donostiako Udalean hautagai sozialista baztertzen badu, PSE-EEk erantzun egingo du eta ez du Markel Olano Gipuzkoako ahaldun nagusigaia babestuko Batzar Nagusietan.
