Politika -
BOTERE-BANAKETA
Sanchezek Fiskaltzaren inguruko akatsa onartu du eta haren autonomia bermatu du
"Fiskaltzaren izendapena Gobernuari dagokio, baina autonomoa da", nabarmendu du eta kanpainaren intentsitateari leporatu dio akatsa.
AGENTZIAK | ERREDAKZIOA
Pedro Sanchez Espainiako Gobernuko jarduneko presidenteak bere akatsa onartu du Fiskaltza Gobernuaren menpe dagoela esateagatik eta Fiskaltzaren autonomia bermatu du.
Hitz egitean ez zela "zehatza" izan onartu du Sanchezek, eta Gobernuan daramatzan hilabeteetan Fiskaltzarekiko eta Botere Judizialarekiko errespetua erakutsi duela azpimarratu du. Gainera, kanpainaren intentsitateari leporatu dio akatsa.
"Fiskaltzaren izendapena Gobernuari dagokio, baina autonomoa da", nabarmendu du eta Gobernuaren lana Fiskaltzari eta Botere Judizialari "laguntzea" dela adierazi du, Carles Puigdemonten estradizioa gauzatzeko.
Adierazpenengatik jasotako kritiken ondoren, Sanchezek argi utzi du Fiskaltzak bere "konfiantza" duela eta Gobernuaren "eskuragarritasuna" erakutsi nahi zuela, ihes egindako independentistak "Justiziaren gainetik egon ez daitezen".
