Erkorekak esan du Zapateroren Gobernuak ez duela EAJren babesik

su Erkoreka Diputatuen Kongresuko EAJren bozeramailearen esanetan, Espainiako Gobernuak ez du 2012ko Aurrekontu Orokorretarako EAJren babesik, datorren urteko aurrekontuen inguruan hitz egiten jarri ere ez direlako egin.

Hauteskundeak aurreratzea egokia den galdetuta, EAJko bozeramaileak ez du ez alde ez kontra agertu nahi izan, eta hori Jose Luis Rodriguez Zapatero Gobernuko presidentearen esku dagoela adierazi du.

"Erabaki horiek hartzeko ardura dutenek erabakitzen dutenaren arabera moldatuko dugu gure estrategia", esan du Erkorekak, eta Zapateroren kargu hartzean ez zuela haren alde bozkatu eta Talde Sozialistaren babesarekin bakarrik hautatu zutela gaineratu du. "Nire botoa gorabehera, gaitasun eta zilegitasun osoa du hori egoteko", erantsi du.

Testuinguru horretan, Erkorekak aitortu du EAJ "aukera guztiak" aztertzen ari dela, baita hauteskundeak aurreratzea ere. Horren iritziz, astelehen honetan argi geratu da aukera hori ez dagoela inola ere baztertuta, gero PSOEk gezurtatu egin badu ere.

2012ko Aurrekontuak babestu gabe hauteskundeak aurreratzea bultzatuko duten galdetu diotenean, buruzagi jeltzaleak erantzun du ez dutela Gobernuarekin datorren urteko aurrekontuen inguruan hitz egingo gaur egun indarrean daudenak babesteko adostu zituzten akordioak "oso-osorik bete arte". "Gobernuak gaur egun ez du gure babesik, izan ere, datorren urteko kontu publikoen inguruan hitz egin ere ez dugu egin oraindik", nabarmendu du.