Politika -
Auzitegi Gorena
Enpresari bat zigortu dute EAko zinegotzi bat erosten saiatzeagatik
Gregorio Ochoa higiezinen alorreko agenteak dirua eskaini zion Biasteriko (Araba) zinegotzi ohi bati golf zelai baten eraikuntza babes zezan.
Erredakzioa
Auzitegi Gorenak urte eta erdiko kartzela zigorra ezarri dio Gregorio Ochoa higiezinen agenteari 2007an Gregorio Lopez Biasteriko (Arabako) EAko zinegotzia erosten saiatzeagatik. Dirua eskaini zion golf zelai baten eraikuntza babestearen truke.
Gorenak gaur eman du ebazpenaren berri Ministerio Fiskalaren eta Mario Balza enpresariaren helegiteak (azken hori absolbitu egin dute) aztertu ostean.
Gregorio Ochoaren kasuan, Ministerio Publikoaren eskaria aintzat hartu du hein batean eta Arabako Probintzia Auzitegiaren zigorra handitu du.
Urtebete, sei hilabete eta egun bateko kartzela-zigorra ezarri diote, lau urte eta erdiz ezingo du kargu edo lan publikorik egin eta 180.000 euroko isuna ordaintzera behartu dute.
Zinegotziaren erabaki bat aldatzeko dirua eskaintzea "ustelkeria politiko-ekonomikoa" dela ebatzi du Gorenak, nahiz eta "azkenean, dirua ematera ez iritsi".