Nafarroako Gobernua: 'Ez da albiste ona Foru Berriaren aurkako helegitea'

Foru Berriko hainbat aginduren aurka Espainiako Gobernuak iragarritako helegitea "ez da albiste ona", Nafarroako Gobernuak onartu duenez, baina autogobernuaren defentsan "Espainiako Gobernuarekiko elkarrizketaren bidea irekita" mantenduko duela esan du.

Hala jakinarazi du Javier Remirez Nafarroako Gobernuko presidenteorde eta bozeramaileak, Exekutiboak Foru Berriaren aurka iragarritako konstituzio-kontrakotasuneko helegitearen berri izan ostean.

Ministro Kontseiluak erabaki du konstituzio-kontrakotasuneko errekurtso bat jartzea Nafarroako Foru Zuzenbide Zibilaren Bilduma edo Foru Berria aldatzeko eta eguneratzeko zortzi aginduren aurka. Agindu horiek 2019ko apirilean onartu ziren.

Kontseiluaren arabera, Espainiako Gobernuak uste du Nafarroako legearen zenbait alderdik Konstituzioak Estatuaren eskumen esklusibo gisa definitzen dituen eskumenak inbaditzen dituztela.

Espainiako Gobernuaren aburuz, urratu egiten du Estatuak lege batzuetan erregistro eta tresna publikoak antolatzeari buruz duen eskumena, baita Estatuak lege-gatazkak ebazteko arauei buruz duen eskumena ere.

Bi aldeen arteko negoziazioak akordiorik gabe amaitu ostean jarri dute helegitea, konstituzionaltasuna zalantzan jartzen duten legearen alderdiei buruzko jarrerak hurbiltzeko lanean aritu baitira.