Politika -
Koronabirusa
Chivitek Nafarroa Suspertzeko Plana iragarri du
Gobernuaren asmoa da erakunde guztiak eta gizarte zibila aintzat hartzea, “aurrerapena, kohesioa eta berrikuntza” helburu neurriak ezartzeko.
Agentziak | Erredakzioa
Nafarroako Gobernuak Nafarroa Suspertzeko Planaren helburu eta urratsak onartuko ditu biharko saioan, Maria Chivite presidenteak iragarri duenez. Neurri sozial eta ekonomikoz, edukiz, bete beharko den edukitzailea izango da, foru erkidegoa “aurrerapenaren, kohesioaren eta berrikuntzaren” bidean jarriko duena, Gobernuaren arabera.
Javier Remirez eta Jose Maria Aierdi presidenteordeak albo banatan zituela bideokonferentziaz eskaini duen prentsaurrekoan, Maria Chivite Nafarroako presidenteak aurreratu du bihartik aurrera plana osatuko duten neurriak diseinatzea dela asmoa, ekainean, deseskalatzearen azken fasearekin batera, onartuta eduki eta martxan jarri ahal izateko.
Gobernuaren “borondatea” plan honetan “Nafarroako erakunde guztiak eta gizarte zibila” aintzat hartzea da, presidenteak azpimarratu duenez, eta, hori dela eta, lan horretan parte hartzeko deia egin die “alderdi politiko, unibertsitate, Nafarroako Udal eta Kontzejuen Federazio, sindikatu, enpresaburu, tokiko ekintza talde, agente sektorial eta bestelako gizarte taldeei”.
