Kaskagorrik ETA goratzeko ekitaldirik ez duela egingo esan du

Kaskagorri konpartsak, Bilbokoetako batek, Aste Nagusian ETA goratzeko ekitaldirik ez duela egingo esan du. Taldeak zehaztu duenez, Auzitegi Nazionalak debekatutako hiru ekitaldiak ez egiteko arrazoirik ez dago: "Kaskagorrirenak diren ekitaldi horiek ez dira existitzen", aipatu dute.

Fernando Andreu Auzitegi Nazionaleko epaileak debekatu egin ditu Kaskagorri konpartsak Bilboko Aste Nagusian presoekin egin asmo zituen hainbat ekitaldi terrorismoa goratzeko arriskua zegoelakoan.

Herrizaingo Sailak jakitera eman duenez, Fiskaltzak eta Dignidad y Justiciak eskatu ondoren hartu du erabakia epaileak. Gainera, Ertzaintzari ekitaldiak zaintzeko eskatu diote, deliturik egin ez dadin eta eginez gero, beharrezko neurriak har ditzan.

Debekatutako ekitaldiak "errepresaliatuen senideekin" egin behar zituzten, gaur 15:00etan, gauerdian, eta bihar goizaldeko hiruetan.

Aipatu iturrien arabera, epaileak gogorarazi du konpartsari aurten ere ez diotela jaietan parte hartzen uzten 2009an presoen argazkiak erakusteagatik eta iaz Auzitegi Nazionalak antzeko beste ekitaldi bat debekatu zuela.