Terrorismoa goraipatzea leporatu diote Gasteizko gaztetxeari

Ertzaintzak terrorismoa goraipatzea leporatu dio Gasteizko alde zaharreko gaztetxeko arduradunari, ETAko presoen argazkiak barruan aurkitu ostean, Eusko Jaurlaritzako Herrizaingo Sailak Efe albiste agentziari jakinarazi dionez.

Joan den igandean, egunsentian, gazte talde batek irain egin zion Ertzaintzari gaztetxe aurretik pasa zirenean.

Poliziak bost pertsona identifikatu zituen, eta horietako lauri Poliziari irain egitea egotzi zieten; bosgarren bat atxilotu zuten ertzainei erasotzen saiatzeagatik.

Halaber, gaztetxean ETAko presoen argazkiak aurkitu eta kendu zituzten ertzainek. Ondorioz, gaztetxeko arduradunari terrorismoa goraipatzea leporatu diote.

Bestalde, Arabako ezker abertzaleak agiri batean jakinarazi duenez, Polizia gaztetxean sartu zen ustekabean jarrera "zirikatzailearekin" eta gaztetxea hustu zuten "kolpeka eta mehatxuekin". Halaber, Arabako ezker abertzalearen arabera, hamar zauritu izan ziren eta pertsona bat atxilotu zuten.