Basagoitik etxe bat du Getxon

Bere ondarea Twitter sare sozialean argitaratu du gaur Antonio Basagoiti Euskadiko PPko presidenteak. Etxe bat Getxon (Bizkaia), hipotekadun pisu bat Bilbon, Gilera motor bat eta Skoda auto bat ditu PPko buruzagiak egun. Gainera, 12.000 euroko kontu korrontea du.

Basagoitik (Bilbo, 1969) hiru alaba ditu eta ezkonduta dago. Bere ondarearen berri eman behar zuela atzo iragarri zuen PPko ordezkariak, Espainiako diputatuek eta senatariek ondasunen gauza bera egin ostean.

Emaztearen, senideen edo lagunen izenean ondasunik jarri ez duela ziurtatu du Basagoitik. Bilboko zinegotzi izateaz aparte, banku batean lan egin zuela eta Aznarren lehen Gobernuko Gazteria zuzendaria (Lan Ministerioa) izan zela gogorarazi du PPko presidenteak. Gainera, legebiltzarkidea da egun.

Basagoitiren hitzetan, "ideologia guztietako politikari gehienak zintzoak dira eta zerbitzu publikoa dute buruan. Politika laudagarria da".