Guardia zibil batzuk Bilduren 'jazarpena'ren aurka elkartuko dira

Guardia Zibilen Elkarte Bateratuak urriaren 22rako kontzentrazio bat deitu du, Eusko Jaurlaritzaren egoitzan, Gasteizen, institutu armatuko agenteek Bilduk zuzendutako Udalen aldetik jasaten duten "jazarpena"ren aurka protestatzeko.

Alberto Moya Guardia Zibilen Elkarte Bateratuko idazkari nagusia Antonio Basagoiti Euskadiko PPko idazkari nagusiarekin bildu da gaur, Euskadin dauden guardia zibilek, baita horien familiakoek ere, jasaten dituzten "etengabeko mehatxuak eta irainak" aztertzeko, Bildu erakundeetan sartu ostean. Herrizaingo Sailak azkeneneko hilabeteotan espedientea egin dien elkarteko buruzagienganako interesa erakutsi du Basagoitik, bileran, Guardia Zibilen elkarteak jakitera eman duenez. Horrez gain, Euskadin guardia zibilen alde deitutako ekimenak babestuko dituela esan du.

Ignacio Cosido PPko Barne bozeramailea ere joan da, eta bere alderdiko hauteskundeetako programak agenteen lan-homologazioa eta Eskubideen eta Betebeharren Legea, bereziki elkarte profesionalen eskubideei dagokiona, jasotzen dituela adierazi du.