Matute:'Madrilen ahots ozena izateak Euskal Herri berria ekarriko du'

"Madrilen ahots indartsu bat izateak Euskal Herri ezberdin bat eraikitzeko erronkara hurbilduko gaitu", esan du Alternatibak. Amaiur, "aldeen batuketa baino gehiago" izango dela adierazi du.

VII. Batzar Nazionala egin dute larunbat honetan Bilbon, datozen hilabeteetarako estrategia finkatzeko.

Oskar Matute eta Ana Etxarte bozeramaileek esan dutenez, datozen hauteskundeetarako zitari "inoiz baino indar eta gogo handiagorekin" egiten dio aurre Alternatibak, "Euskal Herri ezberdina eraikitzeko, erabat ezberdina den mundu batean, eta horretarako Madrilen ahots indartsu bat izateak erronkara hurbilduko gaitu".

"Berriz ere aldeen batuketa baino gehiago izango gara, pertsona oso ezberdinen konfiantza izango dugulako, eta horien esanetara jarriko dugu gure borroka, ilusioa eta itxaropena", adierazi dute. Joan den maiatzaren 22ko hauteskundeek "testuinguru politikoan mugarri bat ezarri dute, EAEko eta Nafarroako erakundeetan Bilduk izan duen sartze arrakastatsuarekin"

Azken hilabeteetan langileen, langabetuen eta pentsiodunen aurkako "eraso gehiago" egon direla salatu dute. "Europako lan eskubideen murrizketa handienak onartu dira Espainian", esan dute, "hainbat agenteen onespenarekin, besteak beste EAJrenarekin".

Bestalde,"Euskal Herriko normalizazio politikoa geroz eta gertuago" dagoela esan dute, "nahiz eta batzuk ez diren mugitu ere egiten", gaineratu dute.

Horregatik, "ETAren su-etenak, egiaztatze prozesuak, Gernikako Akordioarekin bat egiteak, Ekinen desegiteak eta indarkeriaren ezak, Gobernu batzuren egoskorkeriarekin topatzen dira, eskubide politikoen urraketarekin eta Bateragune bezalako epaiekin".