Estatuarekin duen 'gatazka' Kongresura eramango du ezker abertzaleak

1984 eta 1989 urteetan hil zituzten Josu Muguruza eta Santiago Brouard Herri Batasunako kideak omendu ditu ezker abertzaleak Bilbon eta bertan, Gorte Nagusietan "Estatua norgehiagoka politikora" eramango duela iragarri du.

200 lagun inguru bildu dira omenaldian, Batasuna ohieko hainbat kiderekin batera eta Brouard eta Muguruzaren senitartekoekin batera. Orain dela 22 eta 27 urte tiroka hil zituzten Muguruza eta Brouard, 1984 eta 1989ko azaroaren 20an.

Amezolako parkean Brouardi eta Errekalde plazan Muguruzari eskainitako oroigarrietan loreak ipini dituzte. Maribi Ugarteburuk hitz egin du ezker abertzalearen izenean. "Josu Muguruza Madrilera joan zen bake proposamen bat eramatera, eta tiroka hartu zuten", esan du. "Gaur, ezker abertzaleak tinko jarraitzen du eta estatuarekin duen norgehiagoka politikoa, Madrilera eramango du, hau da, askatasun osoz, betorik gabe eta gizartearen gehiengoak zehaztutako mugak dituen ideien alderatzea".