Politika -
Erreakzioak
Alderdi politikoen erreakzioak EAEn
EAJk alderdien arteko akordio baten beharra azpimarratu du. Amaiurrek, aldiz, igandekoa "gau magikoa" dela adierazi dute, eta PP, ostera, gustura agertu da helburuak bete dituelako.
Erredakzioa
Iñigo Urkullu EAJko presidenteak alderdi guztien arteko "akordio handi baten" beharra azpimarratu du egungo krisi ekonomikoari eta "Estatuak bizi duen egoera oso larriari" aurre egiteko. Urkulluren hitzetan, bere alderdiak helburuak bete ditu: Euskadiko lehen indar politikoa izan eta Diputatuen Kongresuan taldea mantentzea.
Gaurko eguna "Eusdirentzako trantsizio berri baten hasiera" izan behar duela izan du. Hori dela eta, EAJk euskaldunak "gorputz eta arimaz" defendatuko dituela gaineratu du. Lortutako bozekin krisiari erantzun, bakea sendotu eta estatus politiko berria adostuko dute jeltzaleek.
PSE: Porrota krisiari leporatu dio
Patxi Lopez PSE-EEko idazkari nagusi eta lehendakariak adierazi duenez, PPk Espainian lortutako "garaipen argia" ikusita, "sozialistei hausnartzeko garaia iritsi zaigu".
Alfredo Perez Rubalcabaren porrotaren errua krisi ekonomikoari bota dio Patxi Lopezek; izan ere, bere ustez "krisia kudeatu behar izan duten gobernuek horren ondorioak jasan behar izan dituzte".
Amaiur: "Gau magikoa da"
Iñaki Antiguedad Kongresurako Amaiurreko zerrendaburua pozik agertu da koalizioak lortutako emaitzekin eta igandeko hau "gau magikoa" dela esan du.
"Gure eskubideak, gure kultura, langileen eskubideak, gazteenak, emakumezkoenak, immigranteenak eta mundu guztiarenak defendatuko ditugu", esan du gainontzeko hautagaiez inguratuta.
PP: "Helburua lortu dugu"
EAEn lortutako hiru diputatuei esker, 2008ko hauteskundeetako kopuru bera, "helburua lortu" dutela esan du Antonio Basagoiti Euskadiko PPko presidenteak.
Agintari popularraren arabera, PPren helburu nagusia Espainian gehiengo osoa lortzea zen, "eta helburu hori bete egin da".