Bi guardia zibil hil izana Tuentin goratzeagatik epaituko dute

Auzitegi Nazionalak urte eta erdiko kartzela zigorra ezar liezaioke Interneteko erabiltzaile bati 2009ko uztailaren 30ean Carlos Saez de Tejada eta Diego Salva Lezaun guardia zibilak hil ondoren Tuenti sare sozialean hilketa hori goratzeagatik.

Tuentin egin zituen adierazpenekin terrorismoaren biktimak umiliatu izana leporatu dio Ana Noe fiskalak Alberto Ortega Rivas akusatuari.

Erabiltzaileak, "Alberoi Asturias Dixebra" izengoitia erabiliz, mezu pribatu bat eta lau publiko partekatu zituen "Gora Euskal Herria" erabiltzailearekin (ezin izan dute identifikatu). Mezu horietan, akusatuak atentatuaren aurrean pozik zegoela esan zuen. "Horiek bilatzen dituzte eta txapelokerrek eztanda egiten dute kar-kar", esan zuen batek. "Kartzelara? Hobe da Mallorcako txapelokerrek bezala eztanda egitea", gaineratu zuen.

Horrez gain, hainbat ertzain sute bat itzaltzen agertzen ziren argazki bat ere komentatu zuen. "Pena da horiek ere ez erretzea", esan zuen. Beste ertzain batzuei buruz zera idatzi zuen: "Ea Mallorcako txapelokerrek bezala amaitzen duten. Gora Euskal Herria librea eta Sozialista. Segi aurrera". "Zurekin bat nator Alberto, tiro bat eta kito", erantzun zion lagunak. "Noski baietz, denei. Zipaioei, txapelokerrei, udaltzainei eta Espainiako poliziei", esan zuen akusatuak.

Tuenti Techologies enpresak salatu zituen eta Fernando Andreu epaileak erabiltzaile horien IP helbidea eskuratzeko eskatu zuen, baina Albertorena bakarrik lortu zuten.