Elkarbizitza eta Memoriari buruzko kongresua iragarri du lehendakariak

Patxi Lopez lehendakariak 2012 Euskadi, Bakea eta Askatasunaren aldeko Kulturen Urtea ireki du gaur Gasteizen egindako ekitaldi batean. Bakearen, elkarbizitzaren eta biktimen inguruan hamaika ekitaldi kultural antolatu dituzte.

Lehendakariak iragarri du Memoriari eta Elkarbizitzari buruzko Kongresua antolatu dutela apirilerako terrorismoak eragin duenaren inguruko kontaketa "justua eta egiazkoa" egiteko helburuarekin.

Lehendakariak errefusatu egin du kongresuak Aieteko Konferentziari aurre egiteko helburua duela.

Patxi Lopezek azaldu duenez, kongresua "ez da inoren kontra egiten, ezta zerbaiti aurre egiteko ere, askatasunaren alde eta elkarbizitza egonkortzeko" ekimena da.

Ekintzak urte osoan

Bestalde, Jaurlaritzatik jakinarazi dutenez, urte osoan biktimen omenezko monolitoak eta xaflak jartzen jarraituko dute ekintza edo hilketa terroristak izan diren leku guztietan.

Gainera, Espainiako gobernuarekin batera, Eusko Jaurlaritzak Terrorismoaren Biktimen oroitidazki bat bultzatuko du, baita Memoria eta Elkarbizitzako Institutua ere, terrorismoaren biktimak gogoratzeko eta omentzeko. Gainera, bakearen, tolerantziaren, elkarbizitzaren eta askatasunaren balio etikoetan hezitzeko politikak ere garatuko dituzte.

Herritarrek ere parte hartu ahal izango dute eta elkarteari laguntzeko deialdia egingo du 2012 Fundazioak. Era horretan, herritarren ekimenetik eta elkarteen, herrien, taldeen, enpresa kulturalen etabarren bitartez ekintzak antolatu nahi dituzte.

Bestalde, Memoriaren eta Elkarbizitzaren inguruko batzar bat egingo dute, eta biktimen testigantzez gain, euskal gizarteari terrorismoak eragindako min eta sufrimenduaren taulak ere egingo dituzte.

Zentzu honetan, azaroaren 10ean, Biktimen Memoriaren eguna egiten jaraituko dute.

Gernika

Gernikako bonbardaketaren 75. urteurrenarekin bat eginez, Gernika eta beste hainbat herrik ere, oroitzapenezko ekitaldiak egingo dituzte. Apirilaren 26an esaterako, Gernikan ospatuko dute eta Euskadiko Orkestra Sinfonikoak Bilbon kontzertu bat eskainiko du.