Foru Gobernuak protokoloa 'bete' du eta ez du ETB ikusteko ordainduko

Nafarroako Gobernua Jaurlaritzarekin sinatutako "protokoloa betetzen ari da" ETB Foru Erkidegoan ikus dadin, izan ere, akordioan "argi geratzen da Nafarroak ez duela euro bat bera ere ordaindu behar" eta telebista-katearen "jabea", Eusko Jaurlaritza, dela ordaindu behar duena.

Horixe adierazi du behintzat Juan Luis Sanchez Muniain Kultura eta Turismo kontseilariak Parlamentuan. NaBaik, Bilduk eta I-Ek eskatuta, agerraldia egin du Batzordean eta berehala azpimarratu du Nafarroako Gobernuak ez diola uko egin bere ardurari, hori baita oposiziotik leporatzen diotena.

"Nafarroak ez du ETB jasotzeko protokoloa urratu", berretsi du. Azaldu duenez, protokoloak dio Nafarroak ETBren emisioa "baimendu" behar duela eta "multiplex zerbitzua eskaini", baina Eusko Jaurlaritzaren esku uzten du "ETB1en eta ETB2ren emisioa garraiatzea eta mantentzea".

Horren harira, kontseilariak adierazi du protokolo horren alde daudela eta bete egin dutela, 2010ean multiplexa eskatu baitzioten Industria Ministerioari eta horrek eman egin zien. "Ordutik aurrera, alde ekonomikoa geratzen da, telebista-kateen jabeak bere gain hartu behar duena", gaineratu du.

EA salatuko dute

Bestalde, atzo EAk esan zuen 12.000 euro inguru euro ordaindu zituztela moldaketa tekniko bat egin eta ETB Iruñerrian ikus dadin. Gainera, Nafarroa osorako egiteak 40.000 euroko kostua izango lukeela jakinarazi zuen.

Horren harira, Sanchez de Munianek ohartarazi du "legez kanpokoa" dela EAkoek egin dutena, seinalea "pirateatu" dutela, eta dagoeneko abisua eman diotela Industria Ministerioari.

Dena dela, ukatu egin du Nafarroako Gobernuak kopurua asmatu zuela ETB ikusteko milioi bat euro ordaindu behar zirela esan zuenean, izan ere, Alberto Surio EITBren zuzendariak berak emandako datua dela gogorarazi du.

Navarra Directo

Era berean, errefusatu egin du 'Navarra Directo' ETBko saioko 20 lanpostuen galera Nafarroako Gobernuaren ardura dela, eta "harrigarri"tzat jo du azalpenak "ondoko gobernuari eskatzea programazio buruari eskatu beharrean", izan ere, Foru Gobernuak ez omen du "inolako" ardurarik gai horretan.

Erreakzioak

Alderdien txandan, Nekane Perez NaBaikoak kritikatu egin du kontseilariak protokoloa betetzen duela esateko "lotsarik ez" izatea, "azken bi urteetan ezer egin ez denean". Arazoa ETB delako sortu dela zehaztu du.

Maiorga Ramirezek (Bildu), bere aldetik, kontseilariaren erantzuna "erabat gaitzesgarria" izan dela salatu du eta bere dimisioa exijitu. Ramirezen arabera, Sanchez Muniainek "gezurra esan dio gizarteari" egokitze teknikoaren prezioaren inguruan, "gainerako euskal lurraldeekin harreman normalak izatea oztopatzeko duen obsesioagatik".

Txema Mauleon I-Ekoa "harrituta" agertu da 12.000 euroko kostuarekin ETB Iruñerrian ikusi delako. Gainera, Nafarroan ETB ikustea herritarren "intereserako" dela argudiatu du.

Roman Felones PSNko parlamentariak ere ETB Nafarroan jasotzeko aukera defendatu du "arrazoi kultural eta sozialengatik", eta kostuak Jaurlaritzak ordaindu behar dituela aitortu duen arren, Nafarroako Gobernuak insistitu egin beharko lukeela adierazi du.

Amaya Zarranzek (PP) ere bat egin du iritzi horrekin eta insistitzeko deia egin dio Foru Gobernuari, Jaurlaritzak bere partea bete dezan.