Egibar: 'Euskal burgesia berria Bildun eta Amaiurren sartzen ari da'

Joseba Egibar EAJren Gipuzku Buru Batzarreko presidenteak adierazi du egungo "euskal burgesia berria Bildun eta Amaiurren" sartzen ari dela, ez EAJn. EAJko militante izan nahi duen jenderik ba ote dagoen galdetuta, Egibarrek gaineratu du 1986an, EAJ eta EA bereizi zirenean, militante jeltzale oldea izan zela, baina egun "bat edo beste" joaten dela Batzokira militante jeltzale izateko asmoarekin.

Joseba Egibarrek asteburuan Barakaldoko BECen EAJk egingo duen Batzar Nagusia izan du hizpide Euskadi Irratian egin dioten elkarrizketa batean.

Batzar Nagusi horretan alderdiaren etorkizuneko ildo nagusiak zehaztuko dituzte, baina baita presidentea hautatu ere, eta hautagai bakarra dagoenez, jakina da Iñigo Urkullu EBBko presidentea berriro izendatuko dutela.

Baina izendapen horrez gain, EBBko ordezkariak ere aukeratuko dituzte. Izan ere, EBB 8 kidez osatuta dago (presidenteaz eta lurraldeetako buruez aparte) eta zalantza egon da Gipuzkoak zortzi horietako bat edo bi izango dituen. Azkenean, Egibarrek adierazi du egun dituzten "datuak ikusita" Gipuzkoak bakarra izango duela, Arabak bi, eta gainerako bostak Bizkaiak.

Bakegintza

ETAk armak utzi ondoren sortu den egoeraz galdetuta, orain lehentasuna presoak Euskal Herriratzea dela aitortu du EAJren buruzagiak.

Hala ere, argi adierazi nahi izan du presoak eta biktimak ez direla "gatazkaren ondorioak, estrategia oker baten (indarkeriaren) ondorio baizik".